د طالبانو حکومت دوبۍ کې افغان کونسلګرۍ ته خپل استازی ګومارلی

په متحده عربي امارتو کې د افغان سفارت ودانۍ

د طالبانو حکومت د ننه سرچینو بي بي سي ته منلي چې په دوبۍ کې د افغان قونسلګرۍ واک هم دوی ته ورکړل شوی دی.

طالبانو دا په یوه بل پسې سفارتي او سیاسي لاسته راوړنه بللې ده.

د طالبانو بهرنیو چارو وزارت هم بي بي سي پښتو پاڼې ته وویل " پدې اړه چې اعلامیه برابره شوه ستاسو سره به هغه شریکه کړو"

ویل کیږي طالبانو د عبدالرحمان فدا په نوم کس د قونسلګرۍ چارو سمبالونکی معرفي کړی.
نوموړي په کابل کې د طالبانو بهرنیو چارو وزارت کې کار کاوه او امیر خان متقي ته نژدې کس بلل کېږي.

له دې مخکې طالبانو د افغانستان په ګاوند ایران کې ديپلوماتیک ماموریت تر لاسه کړ.

د ایران او طالبانو بهرنیو چارو وزارتونو هغه مهال د دېپلوماتانو ادلون بدلون یو معمولي امر بللی و.

ایران کې افغان سفارت ته د طالبانو لېږل شوې استازي

په ایران کې طالبانو ته د افغان سفارت چارو سمبالول چې ډېرو یې ګمان نه کاوه که له یوې خوا په سیاسي ډګر کې د طالبانو لویه لاسته راوړنه بلل شوې له بلې خوا یې د ځينو پراخ غبرګونونونه هم په وپارول.

له دې سره هم مهاله د ترکیې په استانبول کې افغان قونسلګرۍ هم طالب پلاوي ته سپارل شوې وه.

په ترکیه کې د مېشتو ځينو افغانانو د معلوماتو له مخې د طالب دېپلوماتانو تر څنګ د جمهوریت ځينې کارکونکي هم په ګده د قونسلګرۍ چارې سمبالوي.

له دې مخکې په قطر او پاکستان کې هم د افغانستان استازولی په یوه بل پسې طالب چارواکو ته سپارل شوې.

په اسلام اباد او دوحه کې د سفارتونو تر څنګ په کراچۍ ، کوټه او پېښور کې طالب دېپلوماتان د افغان استازولیو چارې پر مخکې وړي.

په روسیه، چین او ترکمنستان کې هم د ځينو طالب دېپلوماتانو حضور منل شوی.

د طالبانو بهرنیو چارو وزارت که څه هم هېوادونه نه ډاګیزه کوي خو وایې د یادو هېوادونو تر څنګ په ځينو نورو هېوادونو کې هم د دوی استازي کار کوي.

طالبان داسې مهال په یوه بل پسې له افغانستانه بهر د هېواد په استازیتوب سفارتونه تر لاسه کوي چې د طالبانو حکومت هیڅ کوم هېواد په رسمیت نه دی پيژندلی خو خپله ځينو هېوادونو هم په کابل کې خپل سفارتونه فعاله ساتلي.

منبع: بی بی سی