ایران د افغانستان سفارت "د طالبانو دیپلوماتانو ته سپاري"

یوې معتبرې سرچینې بي بي سي فارسي ته ویلي، چې د ایران د بهرنیو چارو وزارت په تهران کې د افغانستان سفارت د طالبانو دیپلوماتانو ته سپاري، خو د ایران د بهرنیو چارو وزارت ویاند وايي، د یوه دیپلومات د ماموریت پای ته رسېدل او بل دیپلومات ته د سفارت د چارسمبالښت‌ چارو سپارل "ددغه سفارت د حقوقي وضعیت د بدلون په معنا نه دي".‌

په دې سره به تهران د سیمې د هېوادونو یو له هغو لومړنیو هېوادونو وي چې د طالبانو ور پېژندل شوی دیپلوماتیک ماموریت رسماً ومني.

په تهران کې د افغانستان د سفارت یوې سرچینې د نوم نه اخیستلو په شرط بي بي سي ته وویل، د دوشنبې په ورځ (کب لومړۍ) د ایران د بهرنیو چارو وزارت چارسمبالی رسول موسوي د افغانستان د مخکېني دولت د سفارت سرپرست دیپلومات عبدالقیوم سلیماني بهرنیو چارو وزارت ته غوښتي و او رسماً یې یې خبر کړی چې "د ایران اسلامي جمهوریت د طالبانو د بهرنیو چارو وزارت له لوري ورپېژندل شوی سرپرست منلی او تاسو باید د طالبانو د بهرنیو چارو وزارت د معرفي پربنسټ د سفارت چارې فضل احمد حقاني ته وسپارئ".‌

ددې سرچینې په وینا، راتلونکې اونۍ (کب اتمه) د سفارت د چارو سپارل کېدو لپاره نېټه ټاکل شوې ده.
طالبانو په مشهد کې هم د افغانستان د کونسلګرۍ لپاره عمومي کونسل معرفي کړی دی. د افغانستان د مخکېني دولت عمومي کونسل واک ته د طالبانو د بیا رسېدو سره له خپلې دندې لاس پر سر شوی دی.

بي بي سي یو مکتوب ترلاسه کړی چې د طالبانو د بهرنیو چارو وزارت سرپست امیر خان متقي په تهران کې د سفارت لپاره فضل احمد حقاني پکې د سرپرست په توګه معرفي کړی دی.
ددغه مکتوب پربنسټ، طالبانو د سفارت د ښوونې او روزنې او سوداګرۍ لپاره هم ډیپلوماتان معرفي کړي دي.

تهران کې د افغانستان سفارت د سرپرستۍ په اړه د طالبانو د بهرنیو چارو وزارت مکتوب

په ورته وخت کې، د ایران د بهرنیو چارو وزارت ویاند ناصر کنعاني د افغانستان د سفارت داخلي بدلونونو په تړاو د خبریالانو پوښتنې ته په ځواب کې وویل، تهران ټینګار لري چې د افغانستان له سرپرست حکومت سره د چلن د څرنګوالي په اړه د اسلامي جمهوریت په دریځ کې هېڅ کوم بدلون نه دی راغلی".

طالبانو په ایران کې د افغانستان استازولیو ته نور ټیټ‌پوړي دیپلوماتان هم معرفي کړي دي.

تر اوسه هېڅ کوم هېواد د طالبانو حکومت په رسمیت نه دی پېژندلی. ایران هم کابل کې د خپلې استازولۍ لپاره سرپرست پلاوی‌ ټاکلی دی.وړاندې بي بي سي ته سرچینو تایید کړې وه چې په ایران کې د افغانستان سفارت ته درې طالب استازي ورغلي او د ایران حکومت یې ماموریت منلی دی.

طالبانو تهران کې د افغانستان سفارت کې د معارف اتشه هم معرفي کړی

طالبانو تهران کې د افغانستان سفارت کې د سوداګرۍ اتشه هم معرفي کړی

د طالبانو له حکومت سره "په هېڅ ډول" کار نه کوو

په تهران کې د افغانستان سفارت کې شاوخوا ۳۵ دیپلوماتان کار کاوه، د ۲۰۲۱ کال اګسټ کې د طالبانو له بیا واکمنېد وروسته د هغه وخت د سفیر عبدالغفور لېوال په ګډون ځینو یې دنده پرېښوده او ځینو یې اروپا او امریکا کې پنا واخیسته.

په دې موده کې د طالبانو د بهرنیو چارو وزارت د ۸ دیپلوماتانو د دندو د ختمېدو اعلان وکړ.

اوس په سفارت کې د تېر افغان حکومت شاوخوا ۱۰-۱۵ دیپلوماتان او کارمنان لا هم شته چې راتلونکی یې مالوم نه دی.

د سفارت ځینو دیپلوماتانو او کارمنانو ویلي "په هېڅ ډول" حاضر نه دي چې د طالبانو حکومت ته کار وکړي.

په ټوله نړۍ کې د افغانستان شاوخوا ۶۵ استازولۍ شته چې اداري او کنسولي برخې یې د طالبانو له بهرنیو چارو وزارت سره په ورځني ډول همکاري لري، خو د طالبانو حکومت ته یې د سیاسي او مالي رپوټونو له ورکولو ډډه کوي.